पुणे -शब्द, दृश्य आणि ध्वनी अर्थात आकाशवाणी, दूरदर्शन या माध्यमांत आपला अमीट ठसा उमटविलेले नीतीन केळकर, ३० सप्टेंबर २०२१ रोजी पुणे आकाशवाणी केंद्राच्या प्रादेशिक वृत्त विभागातून संचालक या पदावरून निवृत्त झाले. आकाशवाणी पुणेतर्फे त्यांना नुकताच निरोप देण्यात आला. विनायक तांबेकर, विजया जोशी, रामदास फुटाणे या सोहळ्याला आवर्जून उपस्थित राहिले. आकाशवाणीतील सर्व अधिकारी व कर्मचा-यांनी केळकर यांना शुभेच्छा दिल्या.
केंद्र सरकारच्या माहिती सेवेत श्री. केळकर यांनी केलेले काम राष्ट्रीय पातळीवर गौरविले गेले. पत्रकारितेच्या विद्यार्थ्यांमध्ये, सर्वसामान्य माणसांमध्ये आणि नेत्यांमध्येही या माध्यमाबाबत त्यांनी साध्या, सोप्या भाषेत कायम जागृती केली. या सोहळ्यात, ‘शब्द, दृश्य आणि ध्वनी….आणि नीतीन केळकर ’ हा माहितीपट दाखविण्यात आला. त्यांचे स्नेही भारतीय माहिती सेवेतील माजी अधिकारी संजय आर्वीकर, साहित्य अकादमीप्राप्त साहित्यिक प्रफुल्ल शिलेदार, सावित्रीबाई फुले पुणे विद्यापीठाच्या जनसंज्ञापन व पत्रकारिता विभागाच्या प्रमुख प्रा. डॉ. उज्ज्वला बर्वे, टिळक महाराष्ट्र विद्यापीठाच्या संज्ञापन विभागाचे प्रा. डॉ. केशव साठ्ये यांनी केळकर सरांचा आणि त्यांच्या कार्याचा या माहितीपटात गौरव केला आहे.
केळकर सरांचा प्रवास व्यक्तिगत असला तरी तो महाराष्ट्र आणि देशातील माध्यमाच्या दृष्टीने महत्त्वाचा दस्तावेज असल्याच्या प्रतिक्रिया यानिमित्ताने व्यक्त केल्या जात आहेत..
