पुणे : महाराष्ट्राची राजकीय राजधानी आणि सांस्कृतिक राजधानी अर्थात मुंबई आणि पुणे या दोन महानगरांत हेलिकॉप्टर कॉरिडॉर सुरू केला जाणार आहे. केंद्रीय नागरी उड्डाण मंत्री ज्योतिरादित्य शिंदे यांनी ही घोषणा केली. या सेवेमुळे कॉर्पोरेट, उद्योजक, वरिष्ठ अधिकारी आणि नेत्यांची सोय होणार असल्याने या नव्या घोषणेचे स्वागत केले जात आहे.
केंद्र सरकारने झपाट्याने विकसित होणा-या दहा शहरांत हेलिकॉप्टरसाठी असे ८२ कॉरिडॉर निश्चित केले असल्याचे मंत्री शिंदे यांनी स्पष्ट केले आहे. उद्योग आणि व्यवसायाच्या दृष्टीने निर्णयप्रक्रिया गतिमान व्हावी, दळणवळण सुलभ आणि वेगाने व्हावे यासाठी हा निर्णय घेण्यात आल्याचे त्यांनी म्हटले आहे.
देशात सुरू होणा-या या महत्त्वाकांक्षी प्रकल्पाच्या पहिल्याच टप्प्यात मुंबई-पुण्याचा समावेश आहे. सुरुवातीला सहा टप्पे त्यासाठी ठरविण्यात आले आहेत. जुहू ते पुणे, महालक्ष्मी रेसकोर्स ते पुणे आणि गांधीनगर-अहमदाबाद असे ते मार्ग आहेत.
इंडियन चेंबर ऑफ कॉमर्स अण्ड इंडस्ट्रीच्या महासंघातर्फे अर्थात फिक्की आयोजित परिषदेत मंत्री शिंदे बोलत होते. पवन हंस लिमिटेड आणि केंद्रीय हवाई मंत्रालयाच्या संयुक्त विद्यमाने ही उद्योग परिषद घेण्यात आली.
