साहित्यदीप या दिवाळी अंकातून आपल्याला वैविध्यपूर्ण साहित्याचा आस्वाद घेता येईल. कथा, कवितांबरोबरच एक वेगळा विषय घेऊन साहित्यदीप आपल्यासमोर आला आहे. वेगवेगळ्या क्षेत्रात वैविध्यपूर्ण पण हटके काम करणा-या व्यक्तींचा परियय यात करून देण्यात आला आहे. त्यात पक्षिमित्र किरण पुरंदरे, लाकडावरील कोरीव काम करणारे श्रीपाद चिलकवाड, चंदेरी जगतात वेगळी वाटचाल करणारी सुनंदा काळुसकर, मूर्तिकलेचा वेगळा अविष्कार पुष्पा द्रविड, सर्पमित्र निलिमकुमार खैरे यांचा समावेश आहे. या मुलाखती म्हणजे त्या त्या क्षेत्राची नेमक्या शब्दांतली माहितीच आहे. चिलकवाड यांची मुलाखत घेतलीय स्वाती सामक यांनी तर, द्रविड यांची मुलाखत नूतन शेटे यांनी घेतलीय. खैरे यांच्याशी संवाद साधला आहे मेधावी तडवळकर-राजवाडे यांनी. अंकाच्या मुख्य संपादक आणि प्रकाशक आहेत ज्योत्स्ना चांदगुडे. अभिनेत्री प्राजक्ता माळी हिचं देखणं मुखपृष्ठ अंकाला आहे. या दिवाळी अंकाला आणि साहित्यदीप प्रतिष्ठानच्या वर्षभर होणा-या कार्यक्रमाला प्रा. मिलिंद जोशी, अड. विलास अत्रे, कवी वि. सु. चव्हाण, गझलकार राजेंद्र शहा, उद्योजक चंद्रशेखर मोरे, कवी डॉ. संदीप अवचट यांचे मार्गदर्शन लाभते. अंकासाठी कार्याध्यक्ष धनंजय तडवळकर, प्रतिभा पवार, माधुरी गयावळ, सतीश गयावळ, उदय कुलकर्णी, विजय शेंडगे आदींचे साह्य लाभले आहे. या अंकात वृंदा दिवाण, श्वेता कुलकर्णी, सुनेत्रा गायकवाड यांच्या कथा आहेत. या दिवाळी अंकाची किंमत १०० रुपये असून पृष्ठे ९६ आहेत.
