नाशिक : शहरात होणार असलेल्या अखिल भारतीय मराठी साहित्य संमेलनासाठी पाहुणे येण्यास सुरुवात झाली आहे. संमेलनासाठी शहर सजले असून नाशिक शहराच्या विविध भागातून साहित्य संमेलनाच्यास्थळी बस सोडल्या जाणार आहेत. हा प्रवास मोफत असेल. हात दाखवून कुठेही बस थांबवता येईल. त्याचे मार्ग आणि वेळापत्रक ठिकठिकाणी लावण्यात आले आहे.
दरम्यान, अनेक सेलिब्रेटींनी संमेलनाला उपस्थित राहण्याचे आवाहन केले आहे. त्यात प्रसिद्ध कवी संदीप खरे आणि अभिनेत्री प्राजक्ता माळी यांचाही समावेश आहे.
संमेलनात संदीप खरे आणि संगीतकार सलील कुलकर्णी मराठी कवितेतील दिग्गजांना मानाचा मुजरा करणार आहेत. माझे जीविची आवडी या कार्यक्रमातून हे सादरीकरण होणार आहे. संत रचनांपासून… स्वातंत्र्यवीर सावरकर… भा.रा. तांबे…कुसुमाग्रज… बोरकर… आरती प्रभू… ग्रेस… शंकर वैद्य…विंदा करंदीकर…मंगेश पाडगांवकर…शांताबाई शेळके…वसंत बापट असा एक काव्य-गीत-संगीतमय देखणा प्रवास यात असेल. काव्य, गीत, संगीताने सजलेली ही संमेलनाची पूर्वसंध्या असेल. तरुणाईला पुन्हा एकदा मराठी काव्य -संगीताकडे वळवणाऱ्या, कवी संदीप खरे आणि संगीतकार दिग्दर्शक सलील कुलकर्णी ह्यांचा, मराठी कवितेतील दिग्गजांना मानाचा मुजरा…सादरकर्ते कवी संदीप खरे संगीतकार सलील कुलकर्णी. यात गायक : हृषिकेश रानडे, विभावरी आपटे- जोशी, शरयू दाते, शुभंकर कुलकर्णी हे आहेत. काव्यवाचन करणार आहेत, चिन्मयी सुमित, विभावरी देशपांडे आणि सूत्रसंचालन असेल मिलिंद कुलकर्णी यांचे. वादक असतील आदित्य आठल्ये, रितेश ओहोळ. सत्यजित प्रभू, राजेंद ढुरकर आणि अमर ओक.
दरम्यान, मराठी भाषेला अभिजात भाषेचा दर्जा मिळण्यासाठी पाठपुरावा करण्यात येत आहे. याच अनुषंगाने नाशिकमध्ये होणाऱ्या अखिल भारतीय मराठी साहित्य संमेलनाच्या माध्यमातून मराठी भाषा अधिक समृद्धीचा जागर करणार असल्याचे प्रतिपादन राज्याचे अन्न, नागरी पुरवठा व ग्राहक संरक्षण मंत्री, जिल्ह्याचे पालकमंत्री तथा संमेलनाचे स्वागताध्यक्ष छगन भुजबळ यांनी केले आहे.
