पुणे : येथील येरवाडा परिसरातील शास्त्री चौकात शिवशाही बस मंगळवारी पेटली. बस पेटल्याचे लक्षात येताच चालकाने प्रसंगावधान दाखवले. त्यामुळे मोठा अनर्थ टळला. या दुर्घटनेत कोणतीही जीवितहानी झाली नाही. भीषण आगीत बसचे मात्र मोठे नुकसान झाले. बस आगीच्या भक्ष्यस्थानी पडली. घटनास्थळी बघ्यांची गर्दी जमली होती. अनेकांनी आपल्या मोबाईल कॅमेऱ्यात कैद केली.
यवतमाळ ते चिंचवड असा दीर्घ पल्ल्याचा प्रवास करणारी शिवशाही बस येरवडा येथील शास्त्री चौकातून निघाली होती. रस्त्यावरुन धावत असताना बसमध्ये अचानक काही बिघाड झाला. ज्याचा चालकाला लगेच संशय आला. चालकाने बस रस्त्याच्या डाव्याबाजूला घेऊन थांबवली. प्रसंगावधान दाखवत प्रवाशांना खाली उतरविण्यात आले.
अग्निशामक दलाच्या जवानांनी तातडीने घटनास्थळी येत आगीवर नियंत्रण मिळवले.
