नवी दिल्ली : अवघ्या देशभरातील तरूणाईत लोकप्रिय असलेल्या व्होग इंडिया या फॅशन मॅगझिनमध्ये मेघा कपूर (वय ३५) ही तरूण कंटेन्ट हेड नुकतीच रुजू झाली आहे. फक्त मुंबई-दिल्लीतल्या लाइफस्टाइलवर नव्हे तर देशभरातील वैविध्यावर आपलं लक्ष असेल, हे मासिक संपूर्ण भारताचे प्रतिनिधित्व करेल, असे तिने आपल्या पहिल्यास संपादकीयात म्हटले आहे. कपूर यांच्या नियुक्तीनंतर भारतीय फॅशन जर्नालिझममध्ये नवा इतिहास लिहिला जाणार असल्याची चुणूक त्यातून दिसत आहे.
व्होग मासिक अमेरिकन फॅशन आणि जीवनशैलीवर आधारित आहे. त्याची भारतीय आवृत्तीही सर्वाधिक वाचक दरासह भारतातील सर्वोत्कृष्ट एव्हर फॅशन मासिक म्हणून ओळखली जाते. व्होग इंडिया मुख्यतः फॅशन, संस्कृती, राहणीमान आणि आरोग्याबाबतच्या प्रत्येक गोष्टीवर लक्ष केंद्रित करते. मासिकाची रचना आणखी वाचककेंद्री करणार असल्याचे कपूर यांनी म्हटले आहे.
मेघा कपूर यांनी दशकापूर्वी सिडनीत व्होगमध्ये इंटर्नशिप केली होती. ती युनिव्हर्सिटी ऑफ मेलबर्नमधील पदवीधर असून, तिने मासिकाच्या ऑस्ट्रेलियातील फॅशन विभागात काम केले आहे. त्यानंतर तिने ऑस्ट्रेलियात इनप्रिंट हे ग्लॉसी मासिक काढले. आता ती व्होग मासिकाची सर्वांत तरूण संपादक म्हणून रुजू झाली आहे.
